وفاقی آئینی عدالت کا نابالغ بچوں کے حقوق کے تحفظ کیلئے بڑا فیصلہ کرتے ہوئے نابالغ بچوں کے مقدمات میں سرپرست کی تقرری لازمی قرار دے دی۔
وفاقی آئینی عدالت نے کیس میں لاہور ہائیکورٹ کا فیصلہ کالعدم دے کر ٹرائل کورٹ کو مقدمہ کی کارروائی چلانے کی ہدایت کردی۔ کیس میں سول کورٹ کے سمجھوتہ کی بنیاد پر کیے گئے فیصلے کو چیلنج کیا گیا تھا۔
درخواست گزار نے نابالغ بچوں کے حقوق کا تحفظ نہ ہونے کا مؤقف اپنایا تھا۔ فیصلے میں وفاقی آئینی عدالت نے نابالغ بچوں، ضعیف افراد اور پردہ نشین خواتین کےمقدمات میں سمجھوتہ عدالت کی جانچ پڑتال سےمشروط قرار دیا ہے۔
عدالت نے کہا کہ کسی بھی مقدمے کے آغاز پر ہی کم عمر فریق کا تعین کیا جائے گا،کم عمرفریق کے حقوق کا تحفظ کیے بغیر فیصلہ نہیں کیا جائے گا،ذاتی مفاد نہ رکھنے والے کو کم عمر افراد کیلئے سرپرست مقرر کیا جائےگا۔
فیصلے میں یہ بھی قرار دیا گیا ہے کہ نابالغ سے متعلق ملکیت کے تنازع میں غیر ضروری عجلت نہیں کی جائےگی۔ آئینی عدالت کا فیصلے کی نقول تمام سول اور ریونیو کورٹس کو بھجوانے کا حکم بھی دیا ہے۔
