تحریر : صدیق بلوچ
اکیسویں صدی میں جب دنیا فرسودہ روایات کے خاتمے انسانی حقوق کے تحفظ قانون کی بالادستی اور مساوات کے فروغ کی بات کر رہی ہے
وہی پاکستان کے معاشرے میں بعض فرسودہ روایات آج بھی انسانی زندگیوں کے لیے خطرہ بنی ہوئی ہیں
ان میں ایک انتہائی سنگین ظالمانہ اور افسوس ناک رسم کاروکاری ہے جسے بلوچستان میں سیاہ کاری پنجاب میں کالا کالی اور خیبر پختونخوا کے بعض علاقوں میں طور طورہ کے نام سے جانا جاتا ہے
مختلف علاقوں میں اس رسم کے نام اور اصطلاحات ضرور مختلف ہیں لیکن اس کی بنیادی نوعیت تقریباً ایک جیسی ہے کسی مرد یا عورت پر ناجائز تعلقات کا الزام عائد کرنا اور پھر نام نہاد غیرت خاندانی عزت یا قبائلی روایات کے نام پر اس کی جان لے لینا
یہاں ایک بنیادی فرق سمجھنا ضروری ہے کہ کاروکاری ایک مخصوص سماجی و ثقافتی اصطلاح ہے جبکہ غیرت کے نام پر قتل ایک وسیع تر جرم ہے جو پاکستان کے مختلف علاقوں میں مختلف ناموں اور وجوہات کے تحت پیش آتا ہے ان وجوہات میں شک ذاتی دشمنی اور جائیداد کے تنازعات سمیت دیگر عوامل بھی شامل ہو سکتے ہیں
اس فرسودہ رسم کا سب سے تشویش ناک پہلو یہ ہے کہ بعض افراد قتل جیسے سنگین جرم کو غیرت اور عزت کا نام دے کر قابل قبول بنانے کی کوشش کرتے ہیں حالانکہ کسی انسان کی جان لینے کا اختیار نہ کسی فرد کو حاصل ہے نہ خاندان کے کسی سربراہ کو اور نہ ہی کسی قبائلی جرگے کو
کاروکاری کے واقعات کا جائزہ لیا جائے تو معلوم ہوتا ہے کہ ہر واقعے کے پیچھے لازماً وہی وجہ نہیں ہوتی جو بظاہر بیان کی جاتی ہے کئی مواقع پر محض شک افواہ ذاتی دشمنی خاندانی تنازع زمین کی تقسیم وراثت کے حقوق اور مالی مفادات کو غیرت کا رنگ دے دیا جاتا ہے بعض واقعات میں مخالف فریق کو نقصان پہنچانے کے لیے کسی عورت یا مرد پر ناجائز تعلقات کا الزام عائد کر دیا جاتا ہے کہیں عورت کو وراثت سے محروم کرنے کہیں اپنی مرضی کی شادی سے روکنے اور کہیں خاندانی دشمنی کا بدلہ لینے کے لیے کاروکاری کو بطور ہتھیار استعمال کیا جاتا ہے
اس سے بھی زیادہ افسوس ناک صورت وہ ہے جس میں عورت کو محض الزام یا شک کی بنیاد پر قتل کر دیا جاتا ہے جبکہ مرد کو مبینہ طور پر رقم کی ادائیگی جرمانے یا کسی سمجھوتے کے ذریعے چھوڑ دیا جاتا ہے سوال یہ ہے کہ اگر الزام درست بھی ہو تو کیا کسی انسان کی جان کی قیمت لگائی جا سکتی ہے؟ کیا کسی مرد کی مبینہ غلطی مالی لین دین کے ذریعے معاف اور عورت کی زندگی ناقابل واپسی ہو جاتی ہے؟
سماجی مبصرین کے مطابق یہ دوہرا معیار اس بات کی عکاسی کرتا ہے کہ بعض علاقوں میں عورت کو اب بھی ایک خودمختار انسان کے بجائے خاندان کی ملکیت سمجھا جاتا ہے
معاشرتی اور سماجی عوامل
سول سوسائٹی سے تعلق رکھنے والے رہنماؤں کے مطابق بلوچستان کے بعض دیہی علاقوں میں کاروکاری اور سیاہ کاری کے واقعات کے پیچھے غربت تعلیم کی کمی معاشی انحصار پدرشاہی سوچ اور فرسودہ قبائلی روایات جیسے عوامل کارفرما ہیں ان دور دراز علاقوں میں خواتین کی تعلیم قانونی آگاہی معاشی خودمختاری اور انصاف تک رسائی کے مسائل اس نوعیت کے جرائم کے خلاف آواز اٹھانے میں بڑی رکاوٹ بن جاتے ہیں
ان رہنماؤں کے مطابق بعض مقامات پر قبائلی اثر و رسوخ اس قدر مضبوط ہوتا ہے کہ متاثرہ خاندان پولیس یا عدالت سے رجوع کرنے کے بجائے مقامی بااثر افراد کے فیصلوں کو قبول کرنے پر مجبور ہو جاتے ہیں
سول سوسائٹی کے نمائندوں کا کہنا ہے کہ خواتین کے حقوق کے لیے کام کرنے والی تنظیمیں انسانی حقوق کے ادارے اور سماجی کارکن اس مسئلے کے خاتمے میں بنیادی کردار ادا کر سکتے ہیں ان کی ذمہ داری صرف واقعات کی مذمت یا اعدادوشمار جاری کرنے تک محدود نہیں ہونی چاہیے بلکہ متاثرہ خواتین اور خاندانوں کو قانونی معاونت محفوظ پناہ گاہوں نفسیاتی مدد اور معاشی بحالی کی سہولتیں فراہم کرنا بھی ضروری ہے
ان کے مطابق دیہی علاقوں میں آگاہی مہمات قانونی تربیتی پروگرام اور تعلیمی سرگرمیوں کو فروغ دیا جانا چاہیے کسی بھی تنظیم یا ادارے کی کارکردگی کو اس کی شفافیت زمینی خدمات اور حقیقی نتائج کی بنیاد پر جانچنا ضروری ہے
غیرت کے نام پر قتل کے اعدادوشمار
اس فرسودہ رسم اور غیرت کے نام پر قتل کے اصل واقعات کی تعداد معلوم کرنا ایک بڑا چیلنج ہے کیونکہ متعدد واقعات رپورٹ ہی نہیں ہوتے بعض واقعات کو عام قتل یا خاندانی تنازع قرار دے دیا جاتا ہے جبکہ بعض متاثرہ خاندان سماجی دباؤ کے باعث خاموش رہتے ہیں
سوشل سسٹین ایبل ڈیولپمنٹ آرگنائزیشن (SSDO) کی 2024 کی رپورٹ کے مطابق پاکستان میں اس سال غیرت کے نام پر قتل کے 547 مقدمات رپورٹ ہوئے
صوبائی اعدادوشمار کے مطابق پنجاب میں 225، خیبر پختونخوا میں 134، سندھ میں 134 اور بلوچستان میں 32 مقدمات درج کیے گئے جبکہ اسلام آباد میں 22 واقعات رپورٹ ہوئے
ہیومن رائٹس کمیشن آف پاکستان (HRCP) سے منسوب پولیس اعدادوشمار کے مطابق سندھ میں 2024 کے دوران غیرت کے نام پر قتل کے 134 مقدمات میں خواتین اور بچیوں سمیت مجموعی طور پر 156 متاثرین سامنے آئے
ان اعدادوشمار کے حوالے سے انسانی حقوق کے حلقوں کا کہنا ہے کہ یہ صرف رپورٹ شدہ واقعات کی عکاسی کرتے ہیں اس لیے انہیں اصل واقعات کی مکمل تعداد نہیں سمجھا جا سکتا تاہم یہ اعدادوشمار واضح کرتے ہیں کہ کاروکاری اور غیرت کے نام پر قتل کسی ایک علاقے کا مسئلہ نہیں بلکہ ایک قومی انسانی حقوق کا بحران ہے
اسلامی تعلیمات اور انسانی جان کی حرمت
علماء کرام کے مطابق اسلام انسانی جان کی حرمت عدل تحقیق اور انصاف پر غیر معمولی زور دیتا ہے کسی شخص پر محض شک افواہ یا الزام کی بنیاد پر اسے مجرم قرار دینا اور پھر قتل کر دینا اسلامی تعلیمات کے بنیادی اصولوں کے منافی ہے
قرآن مجید کی سورۃ المائدہ آیت 32 میں ایک بے گناہ انسان کے قتل کی سنگینی بیان کی گئی ہے اور اسے پوری انسانیت کے قتل کے مترادف قرار دیا گیا ہے
علماء کرام کے مطابق اسلام میں زنا جیسے سنگین الزام کے لیے بھی مخصوص شرعی اصول اور ثبوت کی سخت شرائط مقرر ہیں سورۃ النور کی آیات 4 تا 5 میں پاک دامن افراد پر الزام لگانے اور اس کے ثبوت کے حوالے سے واضح احکامات موجود ہیں
لہٰذا کسی شخص کو اپنی مرضی سے ملزم قرار دے کر سزا دینا جرگے کے ذریعے قتل کا فیصلہ کرنا یا محض خاندانی غیرت کی بنیاد پر کسی کی جان لے لینا اسلامی عدل و انصاف سے مطابقت نہیں رکھتا
مذہبی علماء کے مطابق ان کی ذمہ داری ہے کہ وہ منبر و محراب سے یہ واضح پیغام دیں کہ غیرت کے نام پر قتل کوئی اسلامی حکم نہیں بلکہ ایک سنگین جرم ہے مذہب کو ایسی روایات کے دفاع کے لیے استعمال نہیں کیا جانا چاہیے جو انسانی جان کے احترام اور انصاف کے بنیادی اصولوں کو پامال کرتی ہوں
قبائلی عمائدین کا کردار اور ذمہ داری
بلوچستان کے قبائلی معاشرے میں عمائدین اور معتبر شخصیات کا سماجی اثر و رسوخ اپنی جگہ ایک حقیقت ہے یہ شخصیات چاہیں تو معاشرتی اصلاح تنازعات کے پُرامن حل اور قانون کی بالادستی کے لیے انتہائی مثبت کردار ادا کر سکتی ہیں
تاہم مسئلہ اس وقت پیدا ہوتا ہے جب کوئی جرگہ یا پنچایت اپنے دائرۂ اختیار سے تجاوز کرتے ہوئے کسی انسان کی زندگی آزادی یا بنیادی حقوق کے بارے میں غیر قانونی فیصلہ صادر کرتی ہے
سماجی و قانونی حلقوں کے مطابق قبائلی روایات کا احترام اپنی جگہ لیکن کوئی روایت انسانی جان سے زیادہ قیمتی نہیں ہو سکتی قبائلی عمائدین کو چاہیے کہ وہ کاروکاری جیسے معاملات میں قتل تشدد زبردستی شادی یا کسی بھی غیر قانونی سزا کی حمایت کرنے کے بجائے متاثرہ افراد کو پولیس متعلقہ انتظامیہ اور عدالتوں سے رجوع کرنے کی ترغیب دیں
کیونکہ معاشرے میں حقیقی عزت اس وقت قائم ہو گی جب بااثر افراد کمزوروں کے تحفظ اور انصاف کے قیام میں اپنا کردار ادا کریں گے
قانونی تحفظ اور غیرت کے نام پر قتل
قانونی ماہرین کے مطابق پاکستان میں غیرت کے نام پر قتل کے خلاف باقاعدہ قانونی تحفظ موجود ہے آئین پاکستان کا آرٹیکل 9 ہر شہری کو زندگی اور آزادی کے تحفظ کا حق دیتا ہے جبکہ آرٹیکل 25 قانون کے سامنے تمام شہریوں کی برابری اور مساوی قانونی تحفظ کی ضمانت دیتا ہے
پاکستان پینل کوڈ (PPC) کی دفعہ 302 کے تحت قتلِ عمد کی سزا موت یا عمر قید ہو سکتی ہے جبکہ دفعہ 299 میں قتل اور متعلقہ قانونی اصطلاحات کی تعریفیں موجود ہیں
اس سلسلے میں 2004 کا فوجداری قانون ترمیمی ایکٹ بھی ایک اہم قانونی پیش رفت تھا جس کے ذریعے غیرت کے نام پر جرائم کے خلاف قانونی ڈھانچے کو مضبوط کیا گیا
بعد ازاں 2016 میں پارلیمنٹ نے Criminal Law (Amendment) (Offences in the Name or on Pretext of Honour) Act, 2016 منظور کیا جس کا مقصد غیرت کے نام پر قتل کرنے والوں کے قانونی گرفت سے بچ نکلنے کے امکانات کو محدود کرنا تھا
قانونی ماہرین کے مطابق اس قانون کے تحت پاکستان پینل کوڈ کی دفعہ 311 میں ترمیم کی گئی اس کے مطابق اگر غیرت کے نام پر قتل کے مقدمے میں مقتول کے ورثا قصاص کا حق معاف یا صلح کر بھی لیں تو عدالت جرم کے حالات اور فساد فی الارض کے اصول کو مدنظر رکھتے ہوئے تعزیری سزا دے سکتی ہے غیرت کے نام پر قتل کی صورت میں دفعہ 311 کے تحت کم از کم دس سال قید کی سزا کا اصول مقرر کیا گیا ہے
اس کے علاوہ ضابطۂ فوجداری میں بھی ترمیم کی گئی تاکہ قتل کے مقدمات میں ورثا کی معافی اور صلح کو دفعہ 311 کی قانونی پابندیوں سے مشروط کیا جا سکے
قانونی ماہرین کے نزدیک اس قانون کی اصل اہمیت یہ ہے کہ غیرت کے نام پر قتل کو محض خاندان کا اندرونی معاملہ قرار دے کر ختم نہیں کیا جا سکتا عدالت کو قانون کے مطابق مقدمے اور دستیاب شواہد کا جائزہ لے کر فیصلہ کرنا ہوتا ہے
میڈیا کا کردار اور ذمہ دارانہ رپورٹنگ
کاروکاری اور غیرت کے نام پر قتل کے واقعات میں میڈیا کا کردار انتہائی اہم ہے صحافتی حلقوں کے مطابق کسی واقعے کی رپورٹنگ کرتے ہوئے صرف قتل کی تفصیلات ملزم کے بیان یا کسی مذہبی شخصیت کے تبصرے تک محدود رہنا کافی نہیں بلکہ واقعے کے اصل محرکات قبائلی اثر و رسوخ خاندانی دشمنیوں جائیداد کے تنازعات پولیس تفتیش قانونی کارروائی اور عدالتی پیش رفت کو بھی سامنے لانا ضروری ہے
اس مقصد کے لیے متعلقہ قبائلی عمائدین مقامی سماجی شخصیات متاثرہ خاندانوں قانونی ماہرین مذہبی علماء اور انسانی حقوق کے کارکنوں کا مؤقف بھی حاصل کیا جانا چاہیے کسی ایک طبقے کو اجتماعی طور پر موردِ الزام ٹھہرانے کے بجائے انفرادی ذمہ داری اور دستیاب شواہد کی بنیاد پر رپورٹنگ کی جائے
کیونکہ ذمہ دار صحافت کا تقاضا ہے کہ مسئلے کے تمام متعلقہ پہلوؤں کو غیر جانب داری سے سامنے لایا جائے
قانون پر عمل درآمد اور عملی اقدامات کی ضرورت
پاکستان میں قوانین کی موجودگی اپنی جگہ ایک اہم پیش رفت ہے لیکن اصل سوال ان قوانین پر مؤثر عمل درآمد کا ہے
قانونی ماہرین اور انسانی حقوق کے کارکنوں کے مطابق قانون نافذ کرنے والے اداروں کو کاروکاری یا غیرت کے نام پر قتل کے بعد جائے وقوعہ سے شواہد اکٹھے کرنےگواہوں کو تحفظ فراہم کرنے اور واقعے کی غیر جانب دارانہ تفتیش کے ذریعے اصل محرکات سامنے لانے چاہئیے تاکہ عدلیہ ایسے مقدمات کی بروقت سماعت اور شواہد کی بنیاد پر فیصلوں کو یقینی بنا سکے
اسی طرح ضلعی انتظامیہ اور متعلقہ حکام کو غیر قانونی جرگوں اور ایسے فیصلوں کے خلاف قانون کے مطابق کارروائی کرنی چاہیے جو کسی شہری کے بنیادی حقوق کی خلاف ورزی کرتے ہوں اس کے ساتھ خواتین کے لیے قانونی امداد پولیس تک محفوظ رسائی اور فوری تحفظ کے مؤثر انتظامات بھی ضروری ہیں
سماجی اور انسانی حقوق کے حلقوں کے مطابق کاروکاری کا خاتمہ صرف قانون سازی سے ممکن نہیں بلکہ اس کے لیے معاشرتی سوچ میں تبدیلی بھی ناگزیر ہے اس مقصد کے لیےدیہی اور قبائلی علاقوں میں لڑکیوں اور لڑکوں دونوں کی تعلیم کو ترجیح دی جائے
خواتین کو وراثت تعلیم روزگار اور قانونی حقوق سے آگاہ کیا جائے
غیرت کے نام پر قتل کرنے والوں کے خلاف بلاامتیاز قانونی کارروائی کی جائے
پولیس اور انتظامیہ کو سیاسی و قبائلی دباؤ سے آزاد ہو کر کام کرنے کا پابند بنایا جائے
قبائلی عمائدین کو اصلاح معاشرہ اور قانون کی بالادستی کے لیے اپنا کردار ادا کرنے پر آمادہ کیا جائے
مذہبی علماء اپنے خطبات میں انسانی جان کی حرمت اور بے بنیاد الزامات کے خلاف واضح مؤقف اختیار کریں
میڈیا واقعات کی غیر جانب دارانہ تحقیق اور ذمہ دارانہ رپورٹنگ کو فروغ دے
انسانی حقوق کی تنظیمیں متاثرہ افراد اور خاندانوں کو عملی قانونی اور سماجی مدد فراہم کریں
حقیقی غیرت کسی کی جان لینے میں نہیں بلکہ اپنی ذمہ داری کردار انصاف اور انسانی اقدار کی حفاظت میں ہے
عورت ہو یا مرد دونوں کو زندگی عزت اور تحفظ کا یکساں حق حاصل ہے
کسی بھی شخص کے خلاف جرم کا الزام ہو تو اس کی تحقیقات اور سزا کا فیصلہ قانون کے مطابق عدالت ہی کر سکتی ہے
بلوچستان سمیت پورے پاکستان میں کاروکاری اور غیرت کے نام پر قتل کا خاتمہ اسی وقت ممکن ہے جب ریاست عدلیہ پولیس مذہبی علماء قبائلی عمائدین میڈیا تعلیمی ادارے اور سول سوسائٹی ایک واضح مؤقف پر متحد ہوں
ضرورت اس امر کی ہے کہ فرسودہ روایات کے بجائے قانون جہالت کے بجائے تعلیم انتقام کے بجائے انصاف اور خوف کے بجائے انسانی احترام کو اپنی معاشرتی بنیاد بنایا جائے
کیونکہ کسی انسان کو قتل کرکے نہ عزت بچائی جا سکتی ہے نہ غیرت ثابت کی جا سکتی ہے اور نہ ہی معاشرے میں انصاف قائم ہو سکتا ہے
کیونکہ کاروکاری غیرت نہیں انسانیت کا قتل ہے

