تل ابیب: اسرائیلی آرمی چیف نے بیرون ملک مقیم حماس رہنماؤں کو بھی نشانہ بنانے کی دھمکی دے دی۔
اسرائیلی فوج کے سربراہ ایال زمیر نے فوج کے ناردرن کمانڈ مرکز میں خطاب کرتے ہوئےکہا کہ غزہ میں حماس کے عسکری ونگ کے ترجمان ابو عبیدہ کو نشانہ بنایا لیکن یہ اختتام نہیں ہے۔
اسرائیلی آرمی چیف نے کہاکہ حماس کی بیشتر قیادت بیرون ملک مقیم ہے، ان تک بھی پہنچیں گے۔
خیال رہےکہ سماجی رابطےکے پلیٹ فارم ایکس پر اسرائیلی وزیر دفاع اسرائیل کاٹس نے دعویٰ کیا ہے کہ غزہ میں ہفتے کے روز ہونے والے اسرائیلی حملے میں فلسطینی مزاحمتی تنظیم حماس کے عسکری ونگ القسام بریگیڈز کے ترجمان ابو عبیدہ شہید ہوگئے۔
اس سے قبل آج اسرائیلی وزیراعظم بنیامین نیتن یاہو نے بھی کہا تھا کہ اسرائیل نے ابو عبیدہ کو نشانہ بنایا ہے تاہم حملے میں ابو عبیدہ کی شہادت کی تصدیق کی جارہی ہے۔
خیال رہے کہ اسرائیلی میڈیا کی جانب سے گزشتہ روز سے ابو عبیدہ کی شہادت کا دعویٰ کیا جارہا ہے تاہم اسرائیلی وزیر دفاع کا بیان اس حوالے سے اسرائیل کا پہلا باضابطہ بیان ہے۔
حماس کی جانب سے تاحال اسرائیلی دعوے پر کوئی ردعمل سامنے نہیں آیا۔
