ایران کی سرکاری خبر رساں ایجنسی ارنا اور تسنیم کے مطابق پاسدارانِ انقلاب نے کویت اور بحرین میں امریکی فوجی تنصیبات کو نشانہ بنایا ہے۔
بیان کے مطابق ایرانی بحریہ اور فضائیہ نے کویت میں امریکی علی السالم ایئربیس اور بحرین کے دارالحکومت منامہ کی پورٹ سلمان میں قائم امریکی ففتھ نیول فلیٹ پر بیلسٹک میزائلوں اور ڈرونز سے حملے کیے۔
آئی آر جی سی کے مطابق یہ کارروائیاں ایران کے پانچ ساحلی مقامات پر امریکی بمباری کے جواب میں کی گئی ہیں۔
ایران کی پاسدارانِ انقلاب نے امریکا کے ساتھ حالیہ کشیدگی کے بعد سخت ردعمل دیتے ہوئے خبردار کیا ہے کہ خطے میں موجود امریکی فوجی اڈے آنے والے دنوں میں جہنم کا سامنا کریں گے۔
پاسدارانِ انقلاب کی بحریہ کے جاری کردہ بیان میں کہا گیا ہے کہ جنوبی ایرانی شہر سیریک پر امریکی حملہ آبنائے ہرمز پر ایران کی برتری کو ختم نہیں کر سکتا، ہرمز میں بحری آمدورفت کے ضوابط کے تحت خلاف ورزی کرنے والے جہازوں کے خلاف مزید سخت کارروائی کی جائے گی۔
آئی آر جی سی نے کہا کہ امریکا اور ایران کے عبوری معاہدے کے مطابق آبنائے ہرمز میں بحری ٹریفک کی نگرانی اور کنٹرول ایران کے اختیار میں ہے اور اب سے قواعد کی خلاف ورزی کرنے والے بحری جہازوں کے ساتھ پہلے سے زیادہ سختی سے نمٹا جائے گا۔
بیان میں مزید خبردار کیا گیا کہ کسی بھی بہانے سے ہونے والی دشمن کی جارحیت کا فیصلہ کن اور منہ توڑ جواب دیا جائے گا۔
ایران کا کہنا ہے کہ جنگ بندی کی خلاف ورزی مفاہمتی یادداشت (MoU) کی خلاف ورزی ہے، جس کے نتیجے میں معاہدے کے تحت جاری تمام عمل مکمل طور پر روک دیے جائیں گے۔
