پاکستان کو رواں سال کے آخر تک چینی ساختہ ففتھ جنریشن اسٹیلتھ طیارے جے- 35 ملنے کا امکان ہے۔
چینی میڈیا کی رپورٹ کے مطابق پاک فضائیہ کے ڈپٹی چیف آف ایئر اسٹاف ایئر وائس مارشل طارق غازی نے تصدیق کی ہے کہ جے- 35 کے حصول کے لیے ابتدائی معاہدے پر دستخط ہو گئے ہیں۔
رپورٹ میں بتایا گیا ہے کہ طارق غازی نے معاہدے کا دائرہ کار واضح کیے بغیر چینگڈو جے- 10 سی لڑاکا طیاروں کی تعداد میں اضافے اور چین کے ساتھ مل کر تیار کردہ جے ایف – 17 جیٹ طیاروں کو اپ گریڈ کرنے کے منصوبوں کی تصدیق کی ہے۔
چین کے سرکاری نشریاتی ادارے سی سی ٹی وی پر چینی ساختہ ففتھ جنریشن اسٹیلتھ طیارے جے- 35 کا پہلا مکمل طور پر آپریشنل ایکسپورٹ ورژن نشر ہونے کے بعد سے میڈیا پر یہ خبریں تیزی سے گردش کرنے لگی ہیں کہ پاکستان کو رواں سال کے اختتام سے پہلے جے- 35 کی ابتدائی کھیپ مل سکتی ہے۔
