چیف جسٹس یحییٰ آفریدی شنگھائی تعاون تنظیم جوڈیشل کانفرنس میں شرکت کیلئے چین روانہ

اسلام آباد:چیف جسٹس پاکستان جسٹس یحییٰ آفریدی چین میں شنگھائی تعاون تنظیم (ایس سی او) جوڈیشل کانفرنس میں شرکت کے لیے چین روانہ ہوگئے ہیں۔ کانفرنس 22 سے 26 اپریل تک چین کے شہر ہانگڑو میں منعقد ہوگی،وفد میں جسٹس امین الدین، جسٹس شاہد وحید، سیشن جج گوادر ظفر جان، سینئر سول جج ضلع لکی مروت نادیہ گل بھی شامل ہیں۔چیف جسٹس پاکستان چین کی سپریم پیپلز کورٹ کے ساتھ تاریخی مفاہمتی یادداشت پر دستخط کریں گے
جسکا مقصد بین الاقوامی تجارتی قانون، ثالثی، سائبر کرائم، مالیاتی جرائم، موسمیاتی تبدیلی سے متعلق قانونی چارہ جوئی اور عدالتی ٹیکنالوجی کے انضمام سمیت اہم شعبوں میں عدالتی تعاون کا فروغ ہے۔جسٹس شاہد وحید مصنوعی ذہانت کا عدالتی اطلاق کے عنوان سے کلیدی خطاب کریں گے۔ چیف جسٹس کی ایران اور ترکی کے چیف جسٹسز کیساتھ دو طرفہ ملاقاتیں بھی شیڈول ہیں۔چیف جسٹس پاکستان خصوصی دعوت پر ترکی کا بھی دورہ کرینگے۔چیف جسٹس ترکیہ کی آئینی عدالت کی 63 ویں سالگرہ کی تقریبات میں شرکت کریں گے۔