کوئٹہ :رکن بلوچستان اسمبلی کے حلقہ پی بی 44 اور پاکستان پیپلز پارٹی بلوچستان کے سینئر رہنما میر عبید گورگیج نے کہا ہے کہ بلوچستان کے عوام ہمیشہ سنجیدہ، باشعور، بیدار اور روشن سیاسی سوچ کے ساتھ دیا ہے۔ عوامی اعتماد پر پورا اترنے کے لیے ضروری ہے کہ منتخب نمائندے زمینی حقائق کو مدنظر رکھتے ہوئے عملی اور دیرپا اقدامات کریں۔
انہوں نے صحافیوں کے گروپ سے گفتگو کرتے ہوئے کہا کہ حلقہ پی بی 44 سمیت پورے بلوچستان میں بنیادی سہولیات کی فراہمی، تعلیم و صحت کے نظام کی بہتری، روزگار کے مواقع پیدا کرنے اور زراعت و معدنیات کے شعبوں کی ترقی کے لیے مربوط حکمت عملی ناگزیر ہے۔ عوام نے ہمیں اپنے مسائل کے حل کے لیے منتخب کیا ہے اور ہم ان کے اعتماد کو کبھی ٹوٹنے نہیں دیں گے۔
میرعبید گورگیج نے مزید کہا کہ پاکستان پیپلز پارٹی ہمیشہ بلوچستان کے حقوق کی ترجمان رہی ہے اور آئندہ بھی صوبے کی ترقی و خوشحالی کے لیے ہر ممکن کردار ادا کرتی رہے گی۔
انہوں نے کہا کہ اگر صوبے کے وسائل کو شفاف طریقے سے استعمال کیا جائے تو نہ صرف پسماندگی کا خاتمہ ممکن ہے بلکہ بلوچستان پورے ملک کی معاشی ترقی میں ایک اہم کردار ادا کر سکتا ہے۔ انہوں نے اپنے حلقہ پی بی 44 کے عوام کو یقین دلایا کہ ترقیاتی منصوبوں کو ترجیحی بنیادوں پر مکمل کیا جائے گا اور نوجوانوں کے لیے ہنر اور روزگار کے نئے مواقع پیدا کیے جائیں گے۔
انہوں نے مزید کہا کہ عوامی خدمت ان کا مشن ہے اور اسے پورا کرنا ان کی ذمہ داری بھی ہے۔ بلوچستان کے سیاسی اور سماجی استحکام کے لیے تمام اسٹیک ہولڈرز کو مل کر آگے بڑھنا ہوگا تاکہ صوبے کا روشن مستقبل یقینی بنایا جا سکے۔
