کوئٹہ الیکٹرک سپلائی کمپنی (کیسکو) نے اعلان کیا ہے کہ رمضان المبارک کے مہینے میں سحر، افطار اور تراویح کے اوقات میں بجلی بلا تعطل فراہم کی جائے گی۔ اس مقصد کے لیے خصوصی انتظامات مکمل کر لیے گئے ہیں۔
چیف ایگزیکٹو آفیسر انجینئر یوسف شاہ خان کی ہدایت پر جنرل منیجرز اور چیف انجینئر کی نگرانی میں کیسکو ہیڈکوارٹر میں ‘پاور ڈسٹری بیوشن سینٹر’ میں ریجنل کنٹرول روم قائم کر دیا گیا ہے۔ یہ کنٹرول روم رمضان کے دوران بجلی کی صورتحال پر مسلسل نظر رکھے گا تاکہ سحر، افطار اور تراویح کے وقت بجلی کی فراہمی جاری رہے۔
اعلامیے کے مطابق صوبائی دارالحکومت کوئٹہ شہر میں ان اوقات کے دوران لوڈشیڈنگ نہیں کی جائے گی۔ اسی طرح کوئٹہ شہر سے باہر تمام ضلعی ہیڈکوارٹرز میں بھی سحر، افطار اور تراویح کے وقت بجلی فراہم کی جائے گی۔ تاہم، دیہی فیڈرز پر پہلے سے جاری شیڈول کے مطابق مختلف اوقات میں بجلی کی فراہمی جاری رہے گی۔
تمام آپریشن سرکلز میں سپرنٹنڈنگ انجینئرز کی نگرانی میں ڈویژن اور سب ڈویژن کی سطح پر خصوصی ٹیمیں تشکیل دی گئی ہیں۔ یہ ٹیمیں تکنیکی خرابی دور کرنے، ٹرانسفارمر کی بروقت تبدیلی اور صارفین کی شکایات کے فوری ازالے کو یقینی بنائیں گی۔
صارفین بجلی کی بندش یا دیگر شکایات کے لیے 118 پر کال کر سکتے ہیں یا اپنے موبائل سے 8118 پر بل کا حوالہ نمبر ایس ایم ایس کر کے شکایت درج کرا سکتے ہیں۔ اس کے علاوہ مرکزی کمپلینٹ سیل نمبر 0819201445 یا متعلقہ سب ڈویژن کے نمبرز پر بھی رابطہ کیا جا سکتا ہے۔ واٹس ایپ نمبر 03198088439 پر بجلی بل کی کاپی اور اپنا فعال موبائل نمبر بھیج کر بھی شکایت درج کرائی جا سکتی ہے تاکہ عملہ فوری طور پر متعلقہ مقام پر پہنچ کر بجلی بحال کر سکے۔
