کوئٹہ: وزیراعلیٰ بلوچستان میر سرفراز بگٹی نے کوئٹہ کے علاقے چمن پھاٹک کے قریب ہونے والے دہشتگردی کے واقعے کی شدید مذمت کرتے ہوئے کہا ہے کہ فتنہ الہندوستان سے وابستہ دہشتگرد معصوم شہریوں، خواتین اور بچوں کو نشانہ بنا کر اپنی درندگی کا مظاہرہ کر رہے ہیں۔
انہوں نے کہا کہ چمن پھاٹک کے قریب ہونے والے دھماکے میں بے گناہ شہریوں کا خون بہانے والے دہشتگرد کسی رعایت کے مستحق نہیں۔ ریاست دشمن عناصر اور ان کے سہولت کاروں کو چن چن کر منطقی انجام تک پہنچایا جائے گا۔
سرفراز بگٹی کا کہنا تھا کہ معصوم لوگوں پر حملے بزدلانہ کارروائیاں ہیں۔ دشمن یہ جان لے کہ بلوچستان میں دہشتگردوں کے لیے کوئی محفوظ پناہ گاہ نہیں رہے گی۔
