وزیراعلیٰ خیبر پختونخوا علی امین گنڈا پور نے فیٹف میں بھارت کو بے نقاب کرنے کا اعلان کرتے ہوئے واضح کیا کہ بھارتی حکومت نے فیٹف میں ان کے بیان کو سیاق و سباق سے ہٹ کر پیش کیا، بھارت پاکستان اور خطے میں ہونے والی دہشت گردی میں ملوث ہے۔
وزیراعلیٰ خیبرپختونخوا علی امین گنڈا پور نے کہا ہے کہ فیٹف کو خط لکھ کر بتایا جائے گا کہ بھارت نے کشمیر اور گلگت بلتستان میں کیا تخریب کاریاں کیں، علی امین گنڈا پور نے بھارت کو فیٹف کی گرے لسٹ میں ڈلوانے کا بھی اعلان کردیا۔
واضح رہے کہ گزشتہ روز بھارتی حکومت نے فیٹف میں علی امین گنڈاپور کا بیان پاکستان کے خلاف بطور ثبوت جمع کروایا تھا جس میں انہوں نے الزام لگایا تھا کہ وہ طالبان کو گرفتار کرتے ہیں لیکن ادارے انہیں رہا کر دیتے ہیں۔
دوسری جانب وزیر اطلاعات پنجاب عظمیٰ بخاری نے کہا ہے کہ بھارت کا گنڈاپور کے بیان کو فیٹف میں استعمال کرنا پوری پی ٹی آئی کے لیے شرمناک ہے، یہ عمل علی امین کے لیے بھی شرمناک اور قابل فکر ہے۔
عظمیٰ بخاری نے کہا کہ ان لوگوں کا سب سے بڑا مسئلہ یہی ہے کہ یہ لوگ منہ کھولنے سے پہلے سوچتے نہیں، تحریک انصاف لوگوں نے پاکستان کو دیوالیہ کروانے کیلئے ہر حربہ استعمال کیا۔
انہوں نے کہاکہ وزیراعظم شہباز شریف نے دن رات محنت اور کامیاب سفارتکاری سے پاکستان کا نام فیٹف کی گرے لسٹ سے نکلوایا، جس کے بعد پاکستا ن کی مغربی منڈیوں تک رسائی اور یورپی یونین سے راہیں ہموار ہوئی۔
عظمیٰ بخاری نے کہا کہ تحریک انصاف کے لوگوں نے پاکستان کو دیوالیہ کرانے کے لیے ہر حربہ استعمال کیا، اس جماعت نے آئی ایم ایف ہیڈ کوارٹر کے باہر بھی احتجاج کیا،آئی ایم ایف کو خط لکھے، اس جماعت سے ملک کے لیے کسی خیر کی توقع نہیں کی جا سکتی۔
صوبائی وزیر اطلاعات کا مزید کہنا تھا کہ بھارت جنگ میں شکست کے بعد عالمی تنہائی کا شکار ہو چکا ہے، مودی حکومت پاکستان سے جنگ ہارنے کے بعد جھوٹے پروپیگنڈے کر رہی ہے۔
