شمالی کوریا کے رہنما کِم جونگ اُن نے ماسکو کو یوکرین کیخلاف جنگ میں مکمل طور پر تعاون کی پیشکش کی ہے۔
سرگئی لاوروف کا دورہِ شمالی کوریا، ماسکو کے اعلیٰ حکام کے اُن متعدد اہم دوروں میں سے ایک ہے جو روس اور پیانگ یانگ کے درمیان فوجی اور سیاسی تعلقات کو مزید گہرا کرنے کی کوششوں کا حصہ ہیں، ایک ایسے وقت میں جب ماسکو، یوکرین کے خلاف اپنی کارروائیاں جاری رکھے ہوئے ہے۔
رپورٹس کے مطابق، شمالی کوریا نے روسی علاقے کورسک سے یوکرینی فوجیوں کو نکالنے کے لیے ہزاروں فوجی بھیجے بلکہ ماسکو کو گولہ بارود اور میزائل بھی فراہم کیے ہیں۔
خبر رساں ایجنسی ’اے ایف پی‘ کی رپورٹ کے مطابق پیانگ یانگ کے سرکاری میڈیا نے بتایا کہ کِم جونگ اُن نے روسی وزیر خارجہ سرگئی لاوروف سے ملاقات کے دوران شمالی کوریا کی جانب سے ماسکو کو مکمل حمایت کی پیشکش کی ہے۔
ماسکو نے بتایا کہ لاوروف اور کم کے درمیان بات چیت گرم جوش اور دوستانہ ماحول میں ہوئی۔
روسی وزارت خارجہ کے جانب سے جاری بیان میں کہا گیا کہ سر گئی لاوروف نے کورسک میں شمالی کوریا کے کردار اور روسی آپریشن کی حمایت پر پیانگ یانگ کا تہہ دل سے شکریہ ادا کیا ہے، ساتھ ہی دونوں ممالک نے اس بات پر بھی اتفاق کیا کہ کورین جزیرہ نما پر بڑھتی ہوئی کشیدگی کی ذمہ داری مغربی طاقتوں پر عائد ہوتی ہے۔
روسی وزرات خارجہ نے دونوں رہنماؤں کی ملاقات کی ویڈیو بھی ٹیلیگرام پر جاری کی، جس میں دونوں رہنماؤں کو مصافحہ کرتے اور گلے ملتے ہوئے دکھایا گیا۔ یہ ملاقات شمالی کوریا کے مشرقی ساحلی شہر ونسان میں ہوئی۔
کوریا کے سرکاری خبر رساں ادارے کے سی این اے نے بتایا کہ کم جونگ اُن نے سرگئی لاوروف سے کہا ہے کہ پیانگ یانگ ، یوکرینی بحران کو جڑ سے ختم کرنے کے لیے روسی قیادت کی جانب سے اٹھائے گئے تمام اقدامات کی غیر مشروط حمایت اور ماسکو کی حوصلہ افزائی کے لیے تیار ہے۔
شمالی کوریا کے سربراہ نے مزید کہا کہ انہیں پورا یقین ہے کہ روسی فوج اور عوام اپنے ملک کی عزت اور بنیادی مفادات کے دفاع کی اس مقدس جدوجہد میں لازماً فتح یاب ہوں گے۔ کِم جونگ اُن نے صدر ولادیمیر پیوٹن کی شاندار قیادت کی بھی تعریف کی۔
روسی خبر رساں ادارے ٹاس نے رپورٹ کیا ہے کہ سرگئی لاوروف نے کم جونگ اُن کو بتایا کہ صدر پیوٹن مستقبل میں بھی براہ راست رابطے جاری رکھنے کی امید رکھتے ہیں۔سر گئی لاوروف کے حالیہ دورہِ شمالی کوریا سے قبل، روس نے اعلان کیا تھا کہ وہ ماسکو اور پیانگ یانگ کے درمیان ہفتے میں 2 بار پروازیں شروع کرے گا۔
روسی وزیرِ خارجہ نے شمالی کوریا کے ونسان شہر کو شاندار سیاحتی مقام قرار دیتے ہوئے اُمید ظاہر کی کہ یہ نہ صرف مقامی شہریوں بلکہ روسی سیاحوں میں بھی مقبول ہوگا۔
کے سی این اے نے 12 جون کو سرگئی لاوروف اور شمالی کوریا کی وزیر خارجہ چوئی سن ہوئی کے ونسان میں ہونے والی ملاقات کے بارے میں جاری بیان میں کہا کہ دونوں ممالک کے تعلقات اب ایک ’ناقابلِ تسخیر اتحاد‘ میں تبدیل ہو رہے ہیں۔
بیان میں مزید کہا گیا کہ روس نے شمالی کوریا کی ریاستی سلامتی کے دفاع کی جائز کوششوں میں مکمل حمایت کا اعادہ کیا ہے۔ جواباً، شمالی کوریا نے بھی یوکرینی تنازع کو جڑ سے ختم کرنے کے لیے ماسکو کی تمام کارروائیوں کی مکمل حمایت کا اظہار کیا ہے۔
ٹاس نے اس سے پہلے رپورٹ کیا تھا کہ سرگئی لاوروگ نے یوکرین کیخلاف روسی کی مدد کے لیے تعینات شمالی کوریائی فوجیوں کا شکریہ ادا کیا گی۔
جنوبی کوریا کے مطابق، تقریباً 600 شمالی کوریائی فوجی روس کے لیے لڑتے ہوئے ہلاک ہو چکے ہیں جبکہ ہزاروں زخمی ہوئے ہیں۔
شمالی کوریا نے پہلی بار اپریل میں تصدیق کی تھی کہ اس نے روس کی جنگ میں مدد کے لیے اپنے فوجی تعینات کیے ہیں، اور یہ بھی تسلیم کیا تھا کہ اس کے کچھ فوجی ہلاک ہو چکے ہیں۔
روسی وزارت خارجہ کے مطابق، دونوں فریقین نے اس عزم کا اظہار کیا کہ وہ مشترکہ طور پر ان عالمی طاقتوں کی بالادستی کی خواہشات کے خلاف مزاحمت کریں گے، جو شمال مشرقی ایشیا اور پورے ایشیا پیسفک خطے میں کشیدگی کو ہوا دے رہی ہیں۔
یاد رہے، روسی صدر ولادیمیر پیوٹن کے گزشتہ برس دورہِ پیانگ یانگ کے دوران دونوں ممالک نے فوجی معاہدہ کیا تھا جس میں ایک شق ساتھ ملکر دفاع کی بھی تھی۔
