اسرائیلی میڈیا کا دعویٰ ہے کہ اماراتی پرواز واقعے کے بعد اسرائیلی وزیر اعظم نیتن یاہو کی متحدہ عرب امارات کے صدر سے ٹیلی فونک گفتگو ہوئی ۔
اسرائیلی میڈیا کے مطابق وزیراعظم بینجمن نیتن یاہو نے بدھ کی شام متحدہ عرب امارات کے صدر شیخ محمد بن زاید سے ٹیلی فون پر گفتگو کی۔
اسرائیلی میڈیا کا کہنا ہے کہ یہ رابطہ بدھ کی صبح فلائی دبئی کی پرواز FZ1073 کو تل ابیب لے جاتے ہوئے کو پائلٹ کی جانب سے مبینہ طور پر جان بوجھ کر طیارہ گرانے کی کوشش کے باعث پیدا ہونے والی صورتحال کے تناظر میں ہوا۔
ادھر اسرائیل کے وزیر خارجہ نے کہاکہ متحدہ عرب امارات کے ہم منصب سے بات کی ہے۔گفتگو میں علاقائی سلامتی و استحکام کے لیے خطرہ بننے والے انتہا پسند عناصر کے خلاف تعاون کرنے پر اتفاق کیا گیا۔
پرواز واقعے کے بعد اماراتی سول ایوی ایشن اتھارٹی کا کہنا ہے کہ تحقیقاتی ٹیمیں متعلقہ اداروں کے ساتھ رابطے میں ہیں ۔
دوسری جانب اماراتی ائیر لائن نے عارضی طور پر اسرائیل آنے اور جانے والی پروازیں معطل کرنے کا اعلان کیا ہے۔
واضح رہے کہ دبئی سے اسرائیل جانے والی پرواز میں مبینہ طور پر پائلٹ لڑپڑے تھے جس کے بعد طیارے نے سعودی عرب میں ہنگامی لینڈنگ کی۔
اسرائیلی وزیر اعظم کے مطابق پرواز کے دوران کو پائلٹ نے مبینہ طور پر کپتان کو چاقو کے وار کر کے زخمی کر دیا اور طیارے کو جان بوجھ کر کریش کرنے کی کوشش کی۔
صورتحال اس وقت کنٹرول میں آئی جب طیارے میں موجود مسافروں نے بروقت مداخلت کر کے کو پائلٹ کو قابو کر لیا۔ بعد ازاں جہاز میں سفر کرنے والے ایئرلائن کے دیگر آف ڈیوٹی پائلٹس نے طیارے کا کنٹرول سنبھال کر اسے بحفاظت سعودی عرب میں اتار لیا۔
اسرائیلی وزیر اعظم کے مطابق سعودی حکام نے حملہ آور کو پائلٹ کو گرفتار کر کے اس سے تفتیش شروع کر دی ہے۔
دوسری جانب فلائی دبئی نے اس واقعے کے حوالے سے قیاس آرائیوں سے گریز کرنے کی اپیل کرتے ہوئے واضح کیا ہے کہ واقعے کے حوالے سے مکمل حقائق ابھی سامنے آنا باقی ہیں۔
