کراچی کے علاقے لیاری کا رہائشی شخص کتے کے کاٹنے سے ریبیز کا شکار ہو گیا۔
جناح اسپتال کے ایمرجنسی انچارج کے مطابق 75 سال کے شہری کو 3 ماہ قبل کتے نے کاٹا تھا، مریض تشویش ناک حالت میں جناح اسپتال میں زیرِ علاج ہے۔
طبی ماہرین کے مطابق ریبیز ایک مہلک بیماری ہے جس کا بر وقت علاج زندگی بچا سکتا ہے۔
ریبیز خطرناک وائرل بیماری ہے جو انسانوں سمیت تمام ممالیہ جانوروں کے اعصابی نظام کو متاثر کرتی ہے، یہ بیماری عموماً متاثرہ جانور کے کاٹنے یا خراش کے ذریعے، یا اس کے لعاب سے منتقل ہوتی ہے۔
طبی ماہرین کے مطابق علامات ظاہر ہونے کے بعد ریبیز تقریباً 100 فیصد جان لیوا ثابت ہوتی ہے تاہم اگر جانور کے کاٹنے کے فوراً بعد حفاظتی علاج (پوسٹ ایکسپوژر پروفیلیکسیس) شروع کر دیا جائے تو اس بیماری سے بچاؤ ممکن ہے۔
