ترجمان سعودی وزارت خارجہ کے مطابق یمن کے صوبے حضرموت میں جاری کشیدگی سعودی قومی سلامتی کیلئے خطرہ ہے، یمن میں برادر ملک متحدہ عرب امارات کے اقدامات پر مایوسی ہوئی۔
یمن میں عرب اتحاد کی فضائی کارروائی کے بعد سعودی وزارت خارجہ نے جاری بیان میں کہا کہ قومی سلامتی کیلئے خطرہ سعودی عرب کی ریڈ لائن ہے، سعودی مملکت تمام ضروری اقدامات اٹھانے سے نہیں ہچکچائے گی۔ کسی بھی خطرے کا فوری اور موثر ردعمل دیا جائے گا۔
بیان کے مطابق یمن کے صوبے حضرموت میں جاری کشیدگی سعودی قومی سلامتی کیلئے خطرہ ہے، متحدہ عرب امارات کے اقدامات یمن میں قیام امن کی کوششوں کی منافی ہے، متحدہ عرب امارات یمنی حکومت کی درخواست پر عمل کرتے ہوئے 24 گھنٹے میں اپنی افواج واپس بلالے۔
واضح رہے کہ آج عرب اتحاد نے یمن میں اسلحہ اسمگل کرنے والے دو بحری جہازوں پر فضائی حملہ کیا ہے۔ بحری جہازوں میں جنوبی یمن کی المکلا بندرگاہ میں ہتھیارلائے جارہے تھے۔ عرب اتحاد کے ترجمان بریگیڈر جنرل ترکی المالکی کے مطابق بندرگاہ پر بڑی مقدار میں اسلحہ اور جنگی گاڑیاں اتاری جارہی تھیں۔ حملہ عالمی قوانین کے اندر رہتے ہوئے کیا گیا جس کی درخواست یمنی صدارتی کونسل کی جانب سے کی گئی تھی۔
