ایک شخص کہہ رہا ہے میں نہیں تو کچھ نہیں ، اس کا بیانیہ ملکی سیکیورٹی کیلئے خطرہ بن چکا ہے، فوج کو سیاست سے دور رکھیں پاک فوج لسانیت یا کسی سیاسی سوچ کی نمائندگی نہیں کرتی: ڈی جی آئی ایس پی آر

ڈی جی آئی ایس پی آر لیفٹیننٹ جنرل احمد شریف کا کہنا ہے کہ ایک شخص کہہ رہا ہے کہ میں نہیں تو کچھ نہیں ، اس کا بیانیہ ملکی سیکیورٹی کیلئے خطرہ بن چکا ہے۔

ڈی جی آئی ایس پی آر لیفٹیننٹ جنرل احمد شریف نے پریس کانفرنس کے دوران کہا کہ چیف آف ڈیفنس فورسز کے ہیڈکوارٹرز کا آغاز ہوگیا ہے ، چیف آف ڈیفنس فورسز کی تعیناتی پر سب کو مبارکباد دیتا ہوں ، چیف آف ڈیفنس فورسز ہیڈکوارٹرز جنگی معاملات کے بارے میں آگاہی فراہم کرے۔

لیفٹیننٹ جنرل احمد شریف نے کہا کہ ایک شخص کہہ رہا ہے کہ میں نہیں تو کچھ نہیں، ایک شخص اپنی ذات کا قیدی ہے ، اس کی سیاست ختم ہوچکی ، اس کا بیانیہ ملکی سیکیورٹی کیلئے خطرہ بن چکا ہے۔

ترجمان پاک فوج کے مطابق فتنہ الخوارج اور عوام کے درمیان پاک فوج ہی کھڑی ہے ، جو اپنی فوج پر حملہ کرتا ہے کیا وہ کسی اور کی فوج کیلئے اسپیس بنانا چاہتا ہے ، فوج کو سیاست سے دور رکھیں پاک فوج لسانیت یا کسی سیاسی سوچ کی نمائندگی نہیں کرتی۔ بغیر کسی ابہام کے کلیئر کرنا چاہتے ہیں اب کسی کا بیانیہ نہیں چلے گا۔