شمالی کوریا کے رہنما کم جون ان نے ملک کے نئے 5,000 ٹن وزنی بحری خطرناک جہاز چو ہائیون سے اسٹریٹجک کروز میزائلوں کے تجربات کی نگرانی کی ہے۔
شمالی کوریا کے سرکاری خبر رساں ادارے ’کورین سینٹرل نیوز ایجنسی‘ کے مطابق یہ تجربہ جہاز کی باضابطہ شمولیت سے پہلے کیا گیا ہے۔
’الجزیرہ‘ کی رپورٹ کے مطابق بدھ کے روز کیے گئے اس تجربے میں سمندر سے زمین پر مار کرنے والے کروز میزائل فائر کیے گئے۔
کم جونگ ان نے نئے جنگی جہاز کو بنیادی صلاحیت قرار دیتے ہوئے کہا ہے کہ یہ شمالی کوریا کے بحری دفاع کے لیے ایک ’نئی علامت‘ ہے۔
انہوں نے کہا کہ ملک کی بحریہ کو مزید جدید اور طاقت ور جنگی جہازوں سے لیس کیا جائے گا، بحریہ میں جوہری ہتھیاروں کی شمولیت تیزی سے آگے بڑھائی جائے گی اور سمندر کے اوپر اور نیچے دونوں جانب سے حملہ کرنے کی صلاحیت میں نمایاں اضافہ ہو گا۔
جنوبی کوریا کی خبر رساں ایجنسی کے مطابق شمالی کوریا عام طور پر ’اسٹریٹجک‘ ہتھیاروں کی اصطلاح اس وقت استعمال کرتا ہے جب ان میں جوہری صلاحیت شامل ہونے کا امکان ہو۔
یہ تجربہ اس وقت سامنے آیا ہے جب شمالی کوریا اپنی بحریہ کو جدید بنانے کے منصوبے پر کام کر رہا ہے۔
یاد رہے کہ مئی 2025ء میں اسی کلاس کے ایک اور جنگی جہاز کی لانچنگ کے دوران حادثہ پیش آیا تھا جس میں جہاز کا پچھلا حصہ قبل از وقت پانی میں گرنے سے نقصان پہنچا تھا۔
کم جونگ ان نے اس واقعے کو ’سنگین غفلت‘ قرار دیا تھا۔
