اسلام آباد:
وفاقی وزیر اطلاعات و نشریات عظاء اللہ تارڑ کا کہنا ہے کہ پی ٹی آئی نے دہشت گردوں کو لا کر بسایا لیکن ٹی ٹی پی پاکستان کی دشمن ہے اور آخری دم تک تعاقب کر کے اس کا خاتمہ کریں گے۔
اسلام آباد میں اہم پریس کانفرنس کرتے ہوئے وفاقی وزیر نے کہا کہ پی ٹی آئی کا لیڈر دہشت گردوں کو شہید کہتا تھا لیکن پاک فوج کے کسی جوان کے لیے کبھی انہوں نے ایک لفظ تک نہیں لکھا، ان کا اپنا ایجنڈا ہے۔
عطاءاللہ تارڑ نے کہا کہ کالعدم ٹی ٹی پی کے خلاف بات کرنے پر پی ٹی آئی والوں کی زبانیں لڑکھڑا جاتی ہیں، پاکستان تحریک انصاف تحریک طالبان کے خلاف بات کیوں نہیں کرتی؟ آج قوم دہشت گردی کا جو خمیازہ بھگت رہی ہے اس کے پیچھے تحریک انتشار کا سیاسی ونگ ہے۔
انہوں نے کہا کہ اے این پی نے دہشت گردی کے خلاف جنگ میں بڑی قربانیاں دی ہیں، اے این پی نے اپنے پیاروں کی لاشیں اٹھائی ہیں لیکن دوسری طرف پی ٹی آئی دہشت گردوں کے لیے نرم گوشہ رکھتی ہے، ضرب عضب کے بعد خیبر پختونخوا میں دہشت گردی کا خاتمہ ہوا تھا۔
عطاءاللہ تارڑ نے کہا کہ ملک ڈیفالٹ ہوتا تو اس وقت صورتحال انتہائی دگرگوں ہوتی لیکن ہماری حکومت ڈیفالٹ کے دہانے سے ابھرتی معیشت بنا ہے۔ حکومت کی پالیسیوں پر بزنس کمیونٹی اور تاجروں کا اعتبار ہے۔
وفاقی وزیر نے کہا کہ پاکستان کے زرمبادلہ کے ذخائر میں اضافہ ہو رہا ہے اور اسٹاک ایکسچینج بہترین پرفارم کر رہی ہے، وزیراعظم جہاں جاتے ہیں پاکستان کی مصنوعات کی بات کرتے ہیں۔
انہوں نے کہا کہ آج ملک کی اسٹاک مارکیٹ نئے ریکارڈ قائم کر رہی ہے۔ مضبوط معیشت اور ریکارڈز اسٹاک مارکیٹ میں سرمایہ کاروں کے اعتماد کا مظہر ہے، معاشی بہتری کے ثمرات آنا شروع ہوگئے ہیں اور صرف دسمبر کے مہینے میں 3.6 ارب ڈالر کی ترسیلات زر ریکارڈ کی گئیں۔
عطاءاللہ تارڑ نے کہا کہ وزیراعظم جس ملک کا دورہ کرتے ہیں تجارتی میدان میں نئی کامیابیاں ملتی ہیں، ملائیشیا نے حلال گوشت اور چاول پاکستان سے درآمد کرنے کی خواہش کا اظہار کیا ہے، بین الاقوامی پروازیں شروع ہوگئی ہیں، دنیا کے ممالک پاکستان کے تجارت اور دفاعی شعبے میں تعاون کے خواہش مند ہیں۔
انہوں نے کہا کہ سعودی عرب کے ساتھ دفاعی معاہدہ پالیسی فریم ورک اور ملائیشیاء کے ساتھ تجارتی پیشرفت اہم کامیابیاں ہیں، آج پاکستان کے گرین پاپسورٹ کو ہر جگہ عزت مل ری ہے۔
