کوئٹہ: پاکستان پیپلز پارٹی کے مرکزی کمیٹی کے رکن و رکنی صوبائی اسمبلی حاجی علی مدد جتک نے اپنے عوامی خدمت کے جذبے اور عوام دوست رویے کے باعث سریاب کے عوام میں بے حد مقبول ہیں۔ حال ہی میں وہ جتک ہاؤس آصف آباد میں اپنے حلقے کے مختلف علاقوں سے آنے والے لوگوں سے ملے، جہاں عوام نے اپنے مسائل پیش کیے۔ اس موقع پر حاجی علی مددجتک نے عوام کے مسائل انتہائی توجہ سے سنے اور ان کے فوری حل کے لیے متعلقہ محکموں کو ہدایات جاری کیں۔
عوام نے شکایت کی کہ علاقے میں ترقیاتی کاموں میں سستی، صفائی ستھرائی کے ناقص انتظامات، پینے کے پانی کی قلت اور بجلی کے مسائل درپیش ہیں۔ اس پر حاجی علی مدد جتک نے کہا کہ وہ عوام کے خادم ہیں، اور ان کی ہر ممکن خدمت ان کی ترجیحات میں شامل ہے۔ انہوں نے مزید کہا کہ پاکستان پیپلز پارٹی عوامی جماعت ہے جو ہمیشہ غریب اور پس ماندہ طبقات کی آواز بنی رہی ہے۔ انہوں نے یقین دلایا کہ سریاب کے تمام علاقوں میں ترقیاتی منصوبوں کا دائرہ وسیع کیا جائے گا تاکہ یہاں کے عوام کو بنیادی سہولیات ان کی دہلیز پر فراہم کی جا سکیں۔
عوام کی بڑی تعداد نے حاجی علی مدد جتک کے اقدامات کو سراہتے ہوئے کہا کہ وہ واحد نمائندہ ہیں جو ہر وقت عوام کے درمیان موجود ہوتے ہیں اور مسائل کو سنجیدگی سے حل کرانے کے لیے کوشاں رہتے ہیں،حاجی علی مدد جتک نے کہا کہ وہ عوام کے اعتماد پر پورا اترنے کی بھرپور کوشش کر رہے ہیں، اور انشاء اللہ سرِیاب کو ترقی و خوشحالی کی راہ پر گامزن کیا جائے گا
