پاکستان اور امریکا نے باہمی تعلقات، انسداد دہشت گردی، بارڈر سیکیورٹی اور انسداد منشیات سمیت مختلف شعبوں میں تعاون بڑھانے پر اتفاق کیا ہے، وزیرداخلہ محسن نقوی نے عالمی امن کےلیے امریکی صدر ٹرمپ کی کوششوں کو سراہا۔
اسلام آباد میں وفاقی وزیر داخلہ محسن نقوی سے امریکی کوآرڈینیٹر برائے انسداد دہشتگردی گریگوری لوگرفو نے ملاقات کی، گریگوری لوگرفو نے پاکستان کے 79 ویں یوم آزادی پر وزیر داخلہ محسن نقوی اور پاکستانی قوم کو مبارکباد دی۔
ملاقات میں پاک امریکا تعلقات، انسداد دہشتگردی، بارڈر سیکیورٹی اور انسداد منشیات سمیت مختلف شعبوں میں تعاون بڑھانے پر اتفاق کیا گیا۔
محسن نقوی نے کہا کہ ٹرمپ کی حکومت آنے کے بعد پاک امریکا تعلقات میں غیر معمولی بہتری آئی ہے، امریکی صدر ڈونلڈ ٹرمپ کی عالمی امن کے لیے مخلصانہ کاوشیں قابل تحسین ہے، امریکا کی جانب سے کالعدم بی ایل اے اور کالعدم مجید بریگیڈ کو عالمی دہشت گرد تنظیمیں قرار دینا احسن اقدام ہے۔
محسن نقوی نے کہاکہ دہشتگردی کے خاتمے کے لیے پاک امریکا تعاون کے مثبت نتائج سامنے آئیں گے، انسداد دہشت گردی ڈائیلاگ سے مشترکہ لائحہ عمل بنانے میں مدد ملے گی۔
پاکستان نے امریکی صدر ڈونلڈ ٹرمپ کی عالمی امن کے لیے مخلصانہ کاوشیں ایک بار پھر قابل تحسین قرار دی ہیں۔
محسن نقوی نے کہا پاک امریکا تعلقات میں شفافیت، باہمی اعتماد اور تعاون کا عنصر نمایاں ہے، امریکی کوآرڈینیٹر برائے انسداد دہشتگردی گریگوری لوگرفو نے دہشت گرد حملوں میں جانی نقصان پر افسوس کا اظہار کیا۔
