اسلام آباد: ایم کیو ایم پاکستان کے رہنما اور وفاقی وزیر صحت مصطفیٰ کمال نے کہا ہےکہ ہم نے کشمیر کی آزادی کی جنگ کراچی کی گلیوں میں لڑی ہے۔
قومی اسمبلی اجلاس میں اظہار خیال کرتے ہوئے مصطفیٰ کمال نے کہا کہ ہمارے ملک میں جتنی دہشتگردی ہورہی ہے اس کے پیچھے بھارت ہے، بھارت میں کچھ ہوجائے تو بھارتی میڈیا سب سےپہلے پاکستان کا نام لیتا ہے، ہمارے ہاں ماضی میں یہ ہوتا تھا کہ آٹھویں لائن میں بھارت کا ذکر ہوتا تھا ۔
انہوں نے کہا کہ بھارت پاکستان میں دہشتگردی میں ملوث ہے اس لیےنام پہلے نمبر پر ہونا چاہیے اور قوم کے بچوں کو پتا ہونا چاہیے کہ بھارت ہمارا دشمن ہے ۔
وفاقی وزیر کا کہنا تھا کہ بھارت نے کراچی کو بھی میدان جنگ بنایا ہوا تھا، وہاں روزانہ 20،20 لوگ مارے جاتے تھے لیکن آج کراچی ’را‘ کے تسلط سے آزاد ہے، ہم نے کشمیر کی آزادی کی جنگ کراچی کی گلیوں میں لڑی ہے، تمام سیاسی جماعتوں ، سول ملٹری قیادت اور قوم نے مل کر جنگ لڑی جس کی مثال نہیں ملتی۔
انہوں نے مزید کہا کہ بھارت کے تمام خوابوں کو پاک فوج اور قوم نے چکنا چور کردیا ،بھارت کے خلاف پوری قوم سیسہ پلائی دیوار بن گئی، آج بھارت اپنے اندر ہی سنبھل ہی نہیں پارہا ہے۔
