امریکی محکمہ خارجہ نے کہا ہے کہ امریکی حکومت کے اہلکاروں کے لیے کراچی کے اعلیٰ درجے کے ہوٹلوں کے دوروں پر عارضی طور پر پابندی عائد کر دی گئی ہے، کیوں کہ انہیں خطرے کی اطلاع موصول ہوئی ہے۔
برطانوی خبر رساں ادارے کے مطابق سیکیورٹی الرٹ میں کہا گیا ہے کہ کراچی میں واقع امریکی قونصل خانہ کو شہر کے اعلیٰ درجے کے ہوٹلوں کو ہدف بنانے کے خطرے کی اطلاع ملی ہے۔
بیان میں کہا گیا ہے کہ کراچی میں امریکی قونصل خانے نے سرکاری امریکی عملے کے ان ہوٹلوں کے دوروں پر عارضی طور پر پابندی لگا دی ہے۔
امریکی محکمہ خارجہ نے کہا کہ وہ بعض اوقات بیرونی ممالک کے مخصوص علاقوں، جیسے کہ سیاحتی مقامات، ہوٹلوں، بازاروں، شاپنگ مالز اور ریسٹورنٹس کو سرکاری امریکی اہلکاروں کے لیے خطرات کی بنیاد پر ممنوع قرار دے دیتا ہے۔
سیکیورٹی الرٹ میں امریکی حکام کو ان علاقوں اور ہجوم سے دور رہنے، کم پروفائل رکھنے اور ان جگہوں پر چوکنا رہنے کی ہدایت کی گئی ہے جو سیاحوں اور مغربی ممالک کے شہریوں میں مقبول ہیں۔
محکمہ خارجہ نے اس وقت پاکستان کے لیے سفری ہدایت نامہ جاری کر رکھا ہے، جس میں امریکی شہریوں کو خبردار کیا گیا ہے کہ وہ دہشت گردی اور ممکنہ مسلح تصادم کے خطرے کے پیش نظر پاکستان کا سفر کرنے سے گریز کریں۔
برطانیہ کی وزارت خارجہ نے بھی جمعے کے روز پاکستان کے کچھ حصوں کے لیے غیر ضروری سفر سے گریز کی ہدایت کی ہے۔
