پاکستان اور برطانیہ کے درمیان ٹریڈ ڈائیلاگ میکنزم کے معاہدے پر باضابطہ دستخط کردیے گئے، لندن میں وفاقی وزیر تجارت جام کمال خان اور برطانوی وزیر ڈگلس الیگزینڈر نے معاہدے پر دستخط کیے۔
یہ پہلا اعلیٰ سطح کا تجارتی معاہدہ ہے، جسے پاکستان نے کابینہ کی منظوری کے بعد طے کیا، معاہدہ دو طرفہ اقتصادی تعاون کو ادارہ جاتی بنیادوں پر استوار کرنے کی جانب بڑا قدم ہے۔
دونوں ممالک نے تجارتی مواقع تلاش کرنے، رکاوٹیں دور کرنے اور باہمی سرمایہ کاری بڑھانے پر اتفاق کیا ۔معاہدے کے تحت مشترکہ ورکنگ گروپس اور باقاعدہ جائزہ اجلاسوں کا قیام عمل میں لایا جائے گا۔
ڈیجیٹل تجارت، قابل تجدید توانائی، زراعت اور دوا سازی جیسے شعبوں میں تعاون پر زور دیا گیا ہے، معاہدے سے دونوں ممالک کے لیے نئی منڈیاں، روزگار کے مواقع اور پائیدار ترقی کی راہ ہموار ہو گی۔
پاکستان نے برآمدات میں اضافے کے لیے آئی ٹی، زرعی ٹیکنالوجی اور فارماسیوٹیکل شعبے کو اجاگر کیا۔
برطانیہ کی ترقی پذیر ممالک کے لیے تجارتی اسکیم (ڈی سی ٹی ایس) کے تحت پاکستان کو سہولت دینے پر اتفاق کیا گیا ہے، تاریخی معاہدہ دوطرفہ تعلقات کو نئے اقتصادی دور میں داخل کرنے کی بنیاد بنے گا۔
