بھارت کی جارحیت، انسانیت کی بد ترین تاریخ ہے، بیرسٹر گوہر علی

راولپنڈی: چیئرمین پی ٹی آئی بیرسٹر گوہر علی نے کہا ہے کہ بھارتی اقدامات کے مقابلے میں اپنی ریاست کے فیصلوں کے ساتھ کھڑے ہیں، ہم کہتے ہیں کہ ہم سب اکٹھے ہو کر بھارت کے خلاف جنگ لڑیں۔راولپنڈی میں میڈیا سے گفتگو کرتے ہوئے انہوں نے کہا کہ بانی پی ٹی آئی سے ملاقات نہ کرانے کا اقدام عدالتی احکامات کی صریح خلاف ورزی ہے جبکہ ملاقاتوں میں رکاوٹ ڈالنا انتہائی غیر مناسب عمل ہے۔عدالتوں کے لارجر بنچ اور سنگل بینچ دونوں کے واضح آرڈرز موجود ہیں، لیکن تاحال ایک بھی عدالتی حکم پر مکمل عملدرآمد نہیں ہوا۔ان کا کہنا تھا کہ جب ملک ایک اہم مرحلے سے گزر رہا ہے اور ہم بھارت کے خلاف قومی یکجہتی کا پیغام دے رہے ہیں، ایسے میں اس نوعیت کی رکاوٹیں غیر ذمہ دارانہ رویے کی عکاسی کرتی ہیں۔بیرسٹر گوہر نے کہا کہ عمران خان ایک مقبول عوامی رہنما ہیں اور ان سے مشاورت قومی معاملات میں ناگزیر ہے۔انہوں نے انکشاف کیا کہ حال ہی میں ان کی چیف جسٹس سے ملاقات ہوئی، جہاں انہوں نے براہِ راست مطالبہ کیا کہ عدالتی احکامات پر عملدرآمد کو یقینی بنایا جائے۔
بیرسٹر گوہر نے کہا کہ اگر ملاقات ہوئی تو ہم بانی پی ٹی آئی سے بھارت کے ساتھ حالیہ کشیدگی پر بھی مشاورت کریں گے، کیونکہ وہ پہلے بھی واضح کر چکے ہیں کہ بھارت کی جارحیت کا سوچا نہیں جائے گا، بلکہ فوری اور بھرپور جواب دیا جائے گا۔یہ بہت بڑی بدقسمتی اور عدالتی حکم کی کھلم کھلا خلاف ورزی ہے۔انہوں نے کہا کہ چیف جسٹس سے درخواست کی کہ اپنے حکم پر عمل کرائیں۔انہوں نے بھارتی حکومت کی جانب سے پاکستانی نیوز چینلز پر پابندی کی شدید مذمت کرتے ہوئے کہا کہ اس سے بھارت کے نام نہاد سیکولر ازم کا پردہ چاک ہو چکا ہے۔ انہوں نے کہا کہ انڈیا اپنے غلط بیانیے کو دنیا کے سامنے مسلط کرنے کی ناکام کوشش کر رہا ہے۔تحریک انصاف کے رہنما نے کہا کہ پارٹی نے نیشنل سیکیورٹی کونسل کے اعلامیے کی بھرپور حمایت کی ہے۔ بھارت کے لیے پاکستانی فضائی حدود بند کرنا بہترین اور جرات مندانہ اقدام ہے، ہم نے نیشنل سیکیورٹی کونسل کے اعلامیے کی حمایت کی ہے۔ ہم انڈیا کے اقدامات کے مقابلے میں اپنی ریاست کے فیصلوں کے ساتھ کھڑے ہیں۔ دریں اثناء تحریک انصاف کے رہنما اعظم سواتی نے میڈیا سے گفتگو کرتے ہوئے کہا ہے کہ بھارت کی جارحیت انسانیت کی بد ترین تاریخ ہے۔ وقت کا تقاضا ہے کہ بانی پی ٹی آئی کو رہا کیا جائے۔سرحدی صورتحال پر بات کرتے ہوئے انہوں کہا ہے کہ ہمارے فوجی جوان ملک و قوم کی حفاظت کیلئے تیار کھڑے ہیں۔