ایران میں قتل کیے گئے 8 پاکستانیوں کی میتیں آج پاکستان کے حوالے کی جائیں گی 8 پاکستانیوں کی میتیں براستہ تفتان پاکستان لائی جائیں گی،چاغی ضلعی انتظامیہ

کوئٹہ:ایران میں قتل کیے گئے 8 پاکستانیوں کی میتیں آج پاکستان کے حوالے کی جائیں گی۔ چاغی ضلعی انتظامیہ نے اس بات کی تصدیق کی ہے کہ 8 پاکستانیوں کی میتیں براستہ تفتان پاکستان لائی جائیں گی۔ انتظامیہ کے مطابق میتوں کو وصول کرنے اور ان کے آبائی علاقوں میں بھیجنے کے لیے تمام انتظامات مکمل کرلیے گئے ہیں۔یہ پاکستانی شہری ایران کے مختلف علاقوں میں قتل کیے گئے تھے، جن کی شناخت اور لاشوں کے حوالے سے ایران کی حکام نے پاکستانی حکام کے ساتھ مکمل تعاون کیا ہے۔ پاکستان اور ایران کے درمیان اس حساس معاملے پر متعلقہ حکام کی جانب سے تیز رفتار اقدامات کیے گئے ہیں تاکہ لاشوں کی وطن واپسی میں کسی قسم کی تاخیر نہ ہو۔مقامی حکام نے کہا ہے کہ میتوں کو فوری طور پر متعلقہ خاندانوں کے حوالے کیا جائے گا تاکہ ان کی تدفین کے لیے ضروری اقدامات کیے جا سکیں۔ اس واقعے کے بعد ایران میں قتل ہونے والے پاکستانیوں کے لواحقین میں غم و غصہ پایا جاتا ہے، اور انہوں نے حکومت پاکستان سے مطالبہ کیا ہے کہ قاتلوں کو جلد از جلد انصاف کے کٹہرے میں لایا جائے۔