ریاستی اداروں پر حملہ ناقابلِ برداشت ہے،عبدالرحمن کھتیران

کوئٹہ:صوبائی وزیر پی ایچ ای سردار عبدالرحمن کھتیران نے مستونگ میں پولیس پر ہونے والے حملے کی شدید الفاظ میں مذمت کی ہے۔ انہوں نے کہا کہ ریاستی اداروں پر حملہ ناقابلِ برداشت ہے اور یہ قومی سلامتی پر حملہ ہے۔سردار کھتیران نے دہشت گرد عناصر کے خلاف فوری اور مثر کارروائی کی ضرورت پر زور دیتے ہوئے کہا کہ قانون نافذ کرنے والے اداروں کی قربانیاں رائیگاں نہیں جائیں گی۔ ان کا کہنا تھا کہ پولیس پر حملہ امن دشمنوں کی بزدلانہ کارروائی ہے، اور اس کی بھرپور مذمت کی جانی چاہیے۔انہوں نے مزید کہا کہ قوم کو ریاست مخالف عناصر کے خلاف متحد ہونا ہوگا اور بلوچستان میں قیامِ امن کے لیے حکومت اور عوام ایک پیج پر ہیں۔ سردار کھتیران نے کہا کہ امن و امان کی راہ میں رکاوٹ ڈالنے والوں کو کیفرِ کردار تک پہنچایا جائے گا۔مستونگ واقعے پر افسوس کا اظہار کرتے ہوئے سردار کھتیران نے شہدا کے لواحقین سے دلی ہمدردی کا اظہار کیا۔