اسلام آباد:صدر مملکت آصف علی زرداری نے دورہ لاہور میں پنجاب میں پاکستان پیپلز پارٹی کو متحرک کرنے کے لیے ہدایات جاری کر دیں۔ذرائع کے مطابق صدر آصف زرداری کی جانب سے صوبہ پنجاب میں زیادہ عہدیدار نامزد کرکے پاکستان پیپلز پارٹی کی پنجاب میں مقبولیت بڑھانے کا نیا فارمولا لانے کا فیصلہ کرلیا گیا ہے۔ذرائع کا کہنا ہے کہ نئے تنظیم سازی پلان کے تحت بڑے شہروں میں ڈسٹرکٹ کمیٹیاں ختم کرنے کا فیصلہ کرلیا گیا ہے،
نئے پلان کے اطلاق کی ابتدا لاہور سے کی جائے گی۔ذرائع کے مطابق نئی تنظیم سازی کے تحت صوبائی دارالحکومت 9 ٹاؤنز اور ایک کنٹونمنٹ پر مشتمل ہوگا، لاہورمیں ٹاؤن کی سطح پر تنظیم سازی کرنے کا فیصلہ پارٹی کو متحرک کرنے کے لئے کیا گیا۔پی پی پی کے ذرائع کے مطابق تنظیم سازی کے عمل سے زیادہ سے زیادہ پارٹی کارکنوں کو لاہور تنظیم میں شامل کیا جائے گا۔لاہورمیں عہدیدارنامزد کرنے کے بعد دیگر شہروں میں بھی اسی فارمولے کا اطلاق کیا جائے گا، قیادت کی رائے ہے کہ نئے پلان کے تحت زیادہ تنظیمی عہدیداران سے پارٹی متحرک ہوگی۔ذرائع کے مطابق پنجاب میں عید کے بعد کارکنان کی رکنیت سازی میں بھی تیزی آئے گی۔
صدر آصف زرداری کا پنجاب میں پیپلز پارٹی کی مقبولیت بڑھانے کیلئے نیا فارمولا لانے کا فیصلہ
